Drejtoresha Ekzekutive e Agjencisë Kosovare për Krahasim dhe Verifikim të Pronës (AKKVP), znj. Afërdita Beka Arifaj, priti në një takim zyrtar Shkëlqesinë e Tij, Ambasadorin e Republikës së Shqipërisë në Kosovë, z. Petrit Malaj.

Gjatë takimit, znj. Beka Arifaj e informoi Ambasadorin Malaj për aktivitetet dhe angazhimin e vazhdueshëm të AKKVP-së në përmbushjen e mandatit të saj. Ajo theksoi rëndësinë e bashkëpunimit dhe shkëmbimit të përvojave në trajtimin e çështjeve pronësore, duke veçuar formalizimin e të drejtave pronësore dhe duke nënvizuar rolin kyç të AKKVP-së në këtë proces.

Ambasadori Malaj e përgëzoi znj. Beka Arifaj për punën dhe përkushtimin e saj, duke shprehur gatishmërinë e Republikës së Shqipërisë për të mbështetur këtë proces përmes shkëmbimit të përvojave ndërmjet institucioneve dhe mekanizmave shtetëror të cilët trajtojnë të drejtat pronësore.